ចាប់តាំងពីបើកដំណើរការមក ក្រុមហ៊ុនមូលបត្រ ភីភី លីង បានចូលរួមចំណែកយ៉ាងសំខាន់ក្នុងការអភិវឌ្ឍទីផ្សារមូលបត្រ និងទីផ្សារឧបករណ៍និស្សន្ទនៅកម្ពុជា ព្រមទាំងទីផ្សារហិរញ្ញវត្ថុសកលផងដែរ។ ទាំងអស់នេះ គឺសម្រាប់ជាប្រយោជន៍សម្រាប់អតិថិជនរបស់យើង និងវឌ្ឍនភាពនៃវិស័យហិរញ្ញវត្ថុពិភពលោកទាំងមូល។
នៅថ្ងៃទី១៣ ដល់ ១៥ ខែកញ្ញា ឆ្នាំ២០២២ ក្រុមហ៊ុនមូលបត្រ ភីភី លីង បានចូលរួមពិព័រណ៍ iFX EXPO Asia 2022 ដែលត្រូវបានរៀបចំឡើងនៅ Centara Grand & Bangkok Convention Centre ក្នុងទីក្រុងបាងកក ប្រទេសថៃ។ សម្រាប់ក្រុមហ៊ុនមូលបត្រ ភីភី លីង យើងមានកិត្តិយសដែលបានធ្វើជាតំណាងទីផ្សារមូលបត្រ និងទីផ្សារឧបករណ៍និស្សន្ទរបស់កម្ពុជា។
ការចូលរួមពិព័រណ៍ iFX EXPO Asia ដែលជាការតាំងពិព័រណ៍សម្រាប់អាជីវកម្មក្នុងវិស័យហិរញ្ញវត្ថុធំបំផុតរបស់ពិភពលោក បានផ្តល់ឱកាសឱ្យក្រុមហ៊ុនមូលបត្រ ភីភី លីង បន្ថែមទៀត ក្នុងការបង្ហាញពីជំនាញវិជ្ជាជីវៈ និងវិសាលភាពសេវាកម្មហិរញ្ញវត្ថុយ៉ាងទូលំទូលាយរបស់ខ្លួន ទៅដល់អ្នកជំនាញ នាយកប្រតិបត្តិ និងថ្នាក់ដឹកនាំកំពូលៗ ដែលអញ្ជើញមកពីក្រុមហ៊ុនអន្ដរជាតិល្បីៗនៅជុំវិញពិភពលោក។
រយៈពេលបីថ្ងៃនៃពិព័រណ៍ iFX EXPO Asia 2022 នេះ ពិតជាពេលវេលាដ៏អស្ចារ្យ ដែលបានទាក់ទាញអ្នកចូលរួមច្រើនជាង ៤ ០០០នាក់ និងវាគ្មិនច្រើនជាង ១០០នាក់។ ជាមួយគ្នាដែរ ក្រុមហ៊ុនមូលបត្រ ភីភី លីង អាចប្រើប្រាស់វេទិកាដ៏ពិសេសមួយនេះ ដើម្បីសង្កេតមើលនិន្នាការ និងគំរូប្រតិបត្តិការអាជីវកម្មអន្ដរជាតិ ក៏ដូចជាផ្លាស់ប្តូរទស្សនៈលើការអភិវឌ្ឍហិរញ្ញវត្ថុនាពេលអនាគត។
លោក ជា សុធា ដែលជាអគ្គនាយក និងអភិបាលនៃក្រុមហ៊ុនមូលបត្រ ភីភី លីង បានមានប្រសាសន៍ថា៖ «យើងមានសោមនស្សដែលបានមកដល់ពិព័រណ៍ iFX EXPO Asia 2022 និងបានផ្សព្វផ្សាយពីទីផ្សារហិរញ្ញវត្ថុរបស់កម្ពុជា នៅលើឆាកអន្តរជាតិ។ លើសពីនេះ អាជ្ញាបណ្ណក្រុមហ៊ុនទីប្រឹក្សាហិរញ្ញវត្ថុរបស់យើង ក៏ជាចំណុចទាក់ទាញមួយយ៉ាងសំខាន់ សម្រាប់ក្រុមហ៊ុនសាជីវកម្មសក្តានុពលនានា ដែលកំពុងស្វែងរកជំនួយក្នុងការចុះបញ្ជីក្នុងផ្សារមូលបត្រកម្ពុជា ដើម្បីទទួលបាននូវអត្ថប្រយោជន៍ផ្សេងៗ ជាពិសេសគុណតម្លៃនៃវិស័យហិរញ្ញវត្ថុនៅកម្ពុជា»។
ក្នុងការរួមចំណែកដល់ការលើកកម្ពស់វិស័យហិរញ្ញវត្ថុ ក្រុមហ៊ុនមូលបត្រ ភីភី លីង តែងតែប្តេជ្ញាចិត្តដើម្បីក្លាយជាចំណែកមួយយ៉ាងសំខាន់ក្នុងសកម្មភាពហិរញ្ញវត្ថុ ហើយតែងតែផ្ដួចផ្ដើមយុទ្ធនាការ និងកម្មវិធីផ្សេងៗ ដើម្បីជំរុញការយល់ដឹង និងការចូលរួមក្នុងទីផ្សារកាន់តែច្រើន។
តាមរយៈការតាំងពិព័រណ៍នេះ ក្រុមហ៊ុនមូលបត្រ ភីភី លីង បានទទួលនូវបទពិសោធន៍ថ្មីៗ ចក្ខុវិស័យ និងផែនការអភិវឌ្ឍន៍ប្រកបដោយនិរន្តរភាព និងគុណភាព ហើយសង្ឃឹមថា យើងទាំងអស់គ្នានឹងអាចជួយដល់ការពង្រីកឱកាសវិនិយោគហិរញ្ញវត្ថុ ភាពជោគជ័យរបស់អតិថិជន និងកំណើនសេដ្ឋកិច្ចពិភពលោកទាំងមូល។
