ក្រុមហ៊ុន មូលបត្រ ភីភី លីង ចូលរួមអបអរសាទរពិធីបើកសម្ពោធបន្ទប់ផ្សាយផ្ទាល់ជាផ្លូវការសម្រាប់កំណើនទីផ្សារឧបករណ៍និស្សន្ទនៅកម្ពុជា
នៅថ្ងៃទី២៤ ខែធ្នូ ឆ្នាំ២០២១ ក្រុមហ៊ុន មូលបត្រ ភីភី លីង បានចូលរួមកម្មវិធីបើកសម្ពោធជាផ្លូវការនៃបន្ទប់ផ្សាយផ្ទាល់របស់ក្រុមហ៊ុន ខេមបូឌាន ដេរីវ៉េទីវ អ៊ិចឆេង ដែលជាក្រុមហ៊ុនសមភាគីកណ្ដាលឈានមុខគេនៅកម្ពុជា។
រួមជាមួយនឹងគណៈប្រតិភូពីនិយ័តករមូលបត្រកម្ពុជា រួមមាន ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា (ន.ម.ក) ឯកឧត្តមបណ្ឌិត វិន ភក្តី អគ្គនាយករងនៃ ន.ម.ក និងសហការី អ្នកតំណាងនៃក្រុមហ៊ុនឈ្មួញជើងសាឧបករណ៍និស្សន្ទ និងភ្ញៀវកិត្តិយសទាំងអស់ ក្រុមហ៊ុន មូលបត្រ ភីភី លីង បានអបអរសាទរយ៉ាងឱឡារិកដល់ក្រុមហ៊ុន ខេមបូឌាន ដេរីវ៉េទីវ អ៊ិចឆេង សម្រាប់សមិទ្ធផលដ៏គួរឱ្យកត់សម្គាល់មួយនេះ ដែលត្រូវបានអភិវឌ្ឍឡើងសម្រាប់ផ្សព្វផ្សាយអំពីទីផ្សារទាំងផ្នែកព័ត៌មាន និងផ្នែកបច្ចេកទេស សម្រាប់សម្រួលដល់កម្មវិធីអប់រំនានាដើម្បីពង្រឹងចំណេះជំនាញ និងសម្រាប់ជួយដល់សាធារណជន ជាពិសេសវិនិយោគិនឱ្យទទួលបានផលចំណេញជាអតិបរមាពីការវិនិយោគ។
លោក Lawrence Kook អភិបាលនៃក្រុមហ៊ុន ខេមបូឌាន ដេរីវ៉េទីវ អ៊ិចឆេង បានបញ្ជាក់ពីគោលបំណងសំខាន់នៃការដាក់ឱ្យដំណើរការបន្ទប់ផ្សាយផ្ទាល់នេះថា៖ « ថ្ងៃនេះ គឺជាការបោះជំហានដ៏សំខាន់មួយទៀតរបស់ក្រុមហ៊ុន ខេមបូឌាន ដេរីវ៉េទីវ អ៊ិចឆេង ដើម្បីផ្សព្វផ្សាយ និងអប់រំអំពីទីផ្សារឧបករណ៍និស្សន្ទនៅកម្ពុជា។ ចាប់តាំងពីឆ្នាំ ២០១៦ មក យើងបានរួមគ្នាអភិវឌ្ឍទីផ្សារបន្ដិចម្តងៗជាមួយនិយ័តកររបស់យើង។ ដូចឃ្លាមួយពោលថា «មហាកំពែងចិន (Great Wall) មិនមែនត្រូវបានសាងសង់រួចរាល់ក្នុងរយៈពេលមួយថ្ងៃនោះទេ។ ដូច្នេះ យើងជឿថា យើងមិនអាចសម្រេចគោលបំណងធំក្នុងពេលដ៏ខ្លី ឬដោយគ្មានសកម្មភាពបានឡើយ។ ផ្ទុយទៅវិញ បើយើងមានសកម្មភាព ទោះជាចាប់ផ្ដើមពីតូចៗទៅក្ដី យើងនឹងអាចសម្រេចបានក្តីសុបិនដ៏ធំរបស់យើងជាក់ជាមិនខាន។ នេះជាដំណើរ ដែលមានអត្ថន័យសម្រាប់យើង។ ជាក់ស្ដែង ដើម្បីធ្វើឱ្យប្រទេសកម្ពុជាក្លាយជាតំបន់វិនិយោគឧបករណ៍និស្សន្ទល្អបំផុតមួយនៅអាស៊ាន យើងត្រូវបន្ថែមរូបមន្ដ និងគ្រឿងផ្សំដែលមានជីវជាតិជាច្រើនទៀតទៅក្នុងទីផ្សារ តាមរយៈការចែករំលែកជំនាញ និងចំណេះដឹងរបស់យើង។ ការបើកសម្ពោធបន្ទប់ផ្សាយផ្ទាល់នេះ ក៏សម្រាប់បម្រើដល់ក្រុមហ៊ុនឈ្មួញជើងសារបស់យើង ក៏ដូចជាក្រុមហ៊ុនឈ្មួញជើងសា និងក្រុមហ៊ុនសមភាគីកណ្ដាលផ្សេងទៀតផងដែរ។ ដូច្នេះ យើងនឹងរង់ចាំទទួលស្វាគមន៍ និងអនុញ្ញាតឱ្យប្រើប្រាស់បន្ទប់ផ្សាយផ្ទាល់នេះ ប្រសិនបើពួកគាត់មានឆន្ទៈក្នុងការចូលរួមចែករំលែកចំណេះដឹងរបស់ពួកគាត់សម្រាប់វិនិយោគិន។ ជាជាងហៅបន្ទប់នេះថា ជាបន្ទប់ផ្សាយផ្ទាល់របស់ក្រុមហ៊ុន ខេមបូឌាន ដេរីវ៉េទីវ អ៊ិចឆេង ខ្ញុំសូមឱ្យភាគីពាក់ព័ន្ធសំខាន់ៗទាំងអស់ ដាក់ឈ្មោះបន្ទប់មួយនេះថា បន្ទប់ផ្សព្វផ្សាយឧបករណ៍និស្សន្ទនៃកម្ពុជា ចាប់ពីពេលនេះតទៅ»។
ឯកឧត្ដម ស៊ូ សុជាតិ បានចូលរួមសាទរដល់ក្រុមហ៊ុន ខេមបូឌាន ដេរីវ៉េទីវ អ៊ិចឆេង ចំពោះសមិទ្ធផលមួយនេះ និងបានលើកសរសើរក្រុមហ៊ុនក្នុងការចូលរួមចំណែកឥតឈប់ឈរ ដើម្បីភាពរីកចម្រើននៃទីផ្សារឧបករណ៍និស្សន្ទនៅកម្ពុជា។
ឯកឧត្ដម ស៊ូ សុជាតិ បានមានប្រសាសន៍ថា៖ «ខ្ញុំពិតជាមានសេចក្តីសោមនស្សរីករាយជាខ្លាំង ដែលបានចូលរួមជាមួយ ឯកឧត្តម ថ្នាក់ដឹកនាំ និងភ្ញៀវកិត្តិយសទាំងអស់ ក្នុងកម្មវិធីបើកសម្ពោធដំណើរការជាផ្លូវការនៃបន្ទប់ផ្សាយផ្ទាល់របស់ក្រុមហ៊ុន ខេមបូឌាន ដេរីវ៉េទីវ អ៊ិចឆេង។ ជាមួយនឹងការខិតខំប្រឹងប្រែងពីគ្រប់ភាគីពាក់ព័ន្ធ ទំហំជួញដូរឧបករណ៍និស្សន្ទសរុបនៅកម្ពុជា បានបន្តកើនឡើងគួរឱ្យកត់សម្គាល់ចាប់តាំងពីឆ្នាំ ២០១៦ មក។ ហើយទោះបីជាមានការរាតត្បាតនៃជំងឺកូវីដ១៩ ជាសកលក្ដី ទំហំជួញដូរឧបករណ៍និស្សន្ទក្នុងឆ្នាំ ២០២១ នេះ នៅតែទទួលបានទិន្នន័យខ្ពស់ ខណៈពេលដែលក្រុមហ៊ុន ខេមបូឌាន ដេរីវ៉េទីវ អ៊ិចឆេង ទទួលបានចំណែកទីផ្សាររហូតដល់ ៨៧%។ ដើម្បីបន្តការអភិវឌ្ឍប្រកបដោយនិរន្តរភាព និងផ្លែផ្កា ក្រុមហ៊ុនឧបករណ៍និស្សន្ទទាំងអស់ ត្រូវប្រកាន់ខ្ជាប់នូវវិជ្ជាជីវៈខ្ពស់បំផុត ក្នុងការផ្តល់ជូនការប្រឹក្សាយោបល់ និងការបណ្តុះបណ្តាលគ្រប់គ្រាន់ដល់អតិថិជន ស្របតាមក្រមសីលធម៌ ទំនួលខុសត្រូវ និងបទប្បញ្ញត្តិ។ ព្រឹត្ដិការណ៍នៃការបើកសម្ពោធក្នុងថ្ងៃនេះ គឺជាគំរូដ៏ល្អមួយ ដែលឆ្លុះបញ្ចាំងពីការចូលរួមចំណែករបស់ក្រុមហ៊ុន ខេមបូឌាន ដេរីវ៉េទីវ អ៊ិចឆេង ក្នុងការអភិវឌ្ឍទីផ្សារទាំងក្នុងតំបន់ និងទៅកាន់ពិភពលោក»។
ក្រុមហ៊ុន មូលបត្រ ភីភី លីង មានមោទកភាព ដែលខ្លួនគឺជាក្រុមហ៊ុនឈ្មួញជើងសាឈានមុខគេមួយរបស់ក្រុមហ៊ុន ខេមបូឌាន ដេរីវ៉េទីវ អ៊ិចឆេង ដោយបានចូលរួមចំណែកយ៉ាងសំខាន់ក្នុងការបង្កើនប្រតិបត្តិការហិរញ្ញវត្ថុ ពង្រឹងចំណេះដឹងផ្នែកហិរញ្ញវត្ថុ ផ្ដល់ឱកាសការងារ និងអភិវឌ្ឍសេដ្ឋកិច្ចជាតិ។ កិច្ចការទាំងអស់នេះ ក៏ត្រូវបានគាំទ្រ សហការ និងសម្របសម្រួលដោយក្រុមហ៊ុន ខេមបូឌាន ដេរីវ៉េទីវ អ៊ិចឆេង ក៏ដូចជានិយ័តករមូលបត្រកម្ពុជាផងដែរ។
