ក្រុមហ៊ុនមូលបត្រ ភីភី លីង ទទួលបានអាជ្ញាបណ្ណក្រុមហ៊ុនឈ្មួញជើងសាមូលបត្រ អាជ្ញាបណ្ណឈ្មួញជើងសាឧបករណ៍និស្សន្ទ និងអាជ្ញាបណ្ណក្រុមហ៊ុនចែកចាយលក់មូលបត្រ ដែលត្រូវបានអនុម័ត និងទទួលស្គាល់ដោយក្រសួងសេដ្ឋកិច្ច និងហិរញ្ញវត្ថុ និយ័តករមូលបត្រកម្ពុជា (ន.ម.ក) និងផ្សារមូលបត្រកម្ពុជា (ផ.ម.ក)។ ក្នុងនាមជាផ្នែកមួយដ៏សំខាន់នៃការត្រួសត្រាយផ្លូវសម្រាប់ការចូលរួមក្នុងសកម្មភាពសេដ្ឋកិច្ចជាតិ ក្រុមហ៊ុនមូលបត្រ ភីភី លីង មានបេសកកម្មផ្តល់ជូននូវបរិយាកាសនៃការវិនិយោគប្រកបដោយគុណភាព និងតម្លាភាពក្នុងទីផ្សារវិនិយោគមូលបត្រ និងឧបករណ៍និស្សន្ទ សម្រាប់ទាំងវិនិយោគិនក្នុងស្រុក និងអន្តរជាតិ។
ជាមួយនឹងការអភិវឌ្ឍឥតឈប់ឈរនៃទីផ្សារហិរញ្ញវត្ថុនៅកម្ពុជា ក្រុមហ៊ុនមូលបត្រ ភីភី លីង បានចូលរួមចំណែកក្នុងសិក្ខាសាលា និងពិព័រណ៍ជាច្រើន។ ក្រោមកិច្ចសហការជាមួយដៃគូ និងនិយ័តកររបស់យើង ក្រុមហ៊ុនមូលបត្រ ភីភី លីង បានផ្សព្វផ្សាយអំពីទីផ្សារទាំងនៅក្នុងស្រុក និងក្រៅស្រុក។ ចំពោះយុទ្ធនាការអប់រំ ក្រុមហ៊ុនក៏បានចូលរួមសិក្ខាសាលាទូទាំង ២៥ ខេត្ត-ក្រុង ដែលត្រូវបានរៀបចំឡើងដោយ ន.ម.ក និងដៃគូអាជីវកម្មផ្សេងទៀត ដោយផ្តល់ជូនប្រជាជនកម្ពុជា ជាពិសេសវិនិយោគិនសក្ដានុពលទាំងអស់នូវចំណេះដឹង បទពិសោធន៍ និងវេទិកានៃការវិនិយោគហិរញ្ញវត្ថុជាលក្ខណៈសកល។
សាររបស់ថ្នាក់ដឹកនាំ
មាគ៌ាដ៏ល្អឥតខ្ចោះឆ្ពោះទៅកាន់ភាពជោគជ័យនៃអនាគតហិរញ្ញវត្ថុរបស់លោកអ្នក
ក្នុងនាមជាក្រុមហ៊ុនផ្តល់សេវាកម្មហិរញ្ញវត្ថុដ៏ទូលំទូលាយបំផុតនៅកម្ពុជា ក្រុមហ៊ុនមូលបត្រ ភីភី លីង មានមោទកភាពក្នុងការចូលរួមចំណែកជាបន្តបន្ទាប់ក្នុងដំណើរការអភិវឌ្ឍសេដ្ឋកិច្ចនៅក្នុងព្រះរាជាណាចក្រកម្ពុជា តាមរយៈការផ្តល់ឱ្យប្រជាជនខ្មែរ ជាពិសេសវិនិយោគិន នូវកម្មវិធីជួញដូរដែលគួរជាទីទុកចិត្ត ឱកាសវិនិយោគល្អៗ វិជ្ជាជីវៈនិងជំនាញស្របតាមស្ដង់ដារអន្តរជាតិ សេវាកម្មអតិថិជនល្អឥតខ្ចោះ និងទំនួលខុសត្រូវសង្គមខ្ពស់។ គ្រប់បេសកកម្ម និងចក្ខុវិស័យរបស់យើង តែងតែផ្ដោតសំខាន់លើសារៈប្រយោជន៍សម្រាប់អតិថិជន និងកំណើនសេដ្ឋកិច្ចរបស់កម្ពុជា។
ចាប់តាំងពីក្រុមហ៊ុនមូលបត្រ ភីភី លីង ត្រូវបានទទួលស្គាល់ជាក្រុមហ៊ុនផ្ដល់សេវាកម្មហិរញ្ញវត្ថុពីក្រសួងសេដ្ឋកិច្ច និងហិរញ្ញវត្ថុ និយ័តករមូលបត្រកម្ពុជា (ន.ម.ក) និងផ្សារមូលបត្រកម្ពុជា (ផ.ម.ក) ដោយមានអាជ្ញាបណ្ណបួនផ្សេងគ្នា រួមមាន៖ អាជ្ញាបណ្ណក្រុមហ៊ុនឈ្មួញជើងសាមូលបត្រ អាជ្ញាបណ្ណក្រុមហ៊ុនទីប្រឹក្សាហិរញ្ញវត្ថុ អាជ្ញាបណ្ណឈ្មួញជើងសាឧបករណ៍និស្សន្ទ និងអាជ្ញាបណ្ណក្រុមហ៊ុនចែកចាយលក់មូលបត្រ យើងតែងតែធ្វើឱ្យប្រាកដថា លក្ខណៈអាជីវកម្មនីមួយៗរបស់យើង គឺជាមាគ៌ា និងជាមធ្យោបាយដ៏មានប្រសិទ្ធភាពសម្រាប់អតិថិជនគោលដៅនៅគ្រប់កាលៈទេសៈទាំងអស់។ ជាលទ្ធផល ជម្រើសវិនិយោគកើតឡើងកាន់តែច្រើន ដើម្បីធានារក្សានូវសុខុមាលភាពហិរញ្ញវត្ថុរបស់អតិថិជន ហើយចំណុចទាំងអស់នេះគឺស្របតាមពាក្យស្លោករបស់ក្រុមហ៊ុនដែលជា «មាគ៌ាដ៏ល្អឥតខ្ចោះឆ្ពោះទៅកាន់ភាពជោគជ័យនៃអនាគតហិរញ្ញវត្ថុរបស់លោកអ្នក»។
ក្រោមកិច្ចសហការជាមួយ ផ.ម.ក យើងសូមបង្ហាញទស្សនៈរបស់យើងថា សមត្ថភាពរបស់យើងនៅក្នុងទីផ្សារមូលបត្រក្នុងនាមជាក្រុមហ៊ុនឈ្មួញជើងសាមូលបត្រ និងក្រុមហ៊ុនចែកចាយលក់មូលបត្រ គឺជាស្ពានដ៏សំខាន់សម្រាប់ការតភ្ជាប់ការវិនិយោគរវាងក្រុមហ៊ុនចុះបញ្ជី និងវិនិយោគិន។ ហេតុនេះហើយ យើងមានកាតព្វកិច្ចផ្ដល់ជូនវិនិយោគិននូវកម្មវិធីជួញដូរចល័ត (Mobile Trading System) ដែលត្រូវបានអភិវឌ្ឍថ្មីដោយ ផ.ម.ក ក៏ដូចជាជម្រើសភាគហ៊ុនដែលបានចុះបញ្ជីនៅ ផ.ម.ក ផងដែរ។ នេះ គឺជាលក្ខណៈកាន់តែល្អប្រសើរសម្រាប់វិនិយោគិនក្នុងការធ្វើពិពិធកម្មផលប័ត្រវិនិយោគរបស់ពួកគាត់ដើម្បីលើកស្ទួយកំណើនហិរញ្ញវត្ថុ។
តាមរយៈការបង្កើត និងការគ្រប់គ្រងប្រតិបត្តិការនៃក្រុមហ៊ុនមូលបត្រ ភីភី លីង យើងបានយល់កាន់តែច្បាស់ថា អភិបាលកិច្ចសាជីវកម្មពិតជាមានសារៈសំខាន់ និងជាបញ្ហាប្រឈមសម្រាប់សហគ្រិនថ្មីថ្មោង។ ដូច្នេះ សម្រាប់កំណើនសេដ្ឋកិច្ចរួមនៅកម្ពុជា យើងស្វែងយល់រាល់បញ្ហាប្រឈមនានា ដើម្បីផ្តល់ការគាំទ្រដល់ម្ចាស់ក្រុមហ៊ុន ដែលត្រូវការចុះបញ្ជីក្នុង ផ.ម.ក និងដើម្បីឱ្យពួកគេទទួលបាននូវអត្ថប្រយោជន៍ដ៏ធំធេងពីការចុះបញ្ជីនេះ រួមមាន៖ លទ្ធភាពក្នុងការចូលរួមក្នុងទីផ្សារមូលធននិងទីផ្សារហិរញ្ញវត្ថុនាពេលអនាគតនៅក្នុងតំបន់អាស៊ាន កិត្ដិនាមនិងប្រជាប្រិយភាពជាក្រុមហ៊ុនចុះបញ្ជី គណនេយ្យភាព ភាពងាយស្រួលក្នុងការរកទីផ្សារ ភាពសម្បូរបែបនៃសន្ទនីយភាព និងការចូលរួមចំណែកដល់កំណើនសេដ្ឋកិច្ចជាតិ។
ចំណុចសំខាន់មួយទៀតនោះគឺ ក្នុងនាមជាក្រុមហ៊ុនឈ្មួញជើងសាឧបករណ៍និស្សន្ទនៅកម្ពុជា យើងមានលទ្ធភាពពិសេសក្នុងការផ្ដល់ជូនសាធារណជននូវចំណេះដឹង និងការប្រឹក្សាយោបល់ហិរញ្ញវត្ថុដ៏ហ្មត់ចត់អំពីរបៀបទាញយកប្រាក់ចំណេញពីការវិនិយោគឧបករណ៍ហិរញ្ញវត្ថុផ្សេងៗ តាមរយៈកម្មវិធីជួញដូរ ដែលត្រូវបានទទួលស្គាល់ទូទាំងពិភពលោក។ តាមរយៈសមត្ថភាពនេះ យើងប្រាកដណាស់ថា អតិថិជនគោលដៅទាំងអស់នឹងរីករាយជាមួយនឹងសេវាកម្មជួញដូរឧបករណ៍និស្សន្ទរបស់យើង។
ក្នុងនាមជាភាគីពាក់ព័ន្ធនឹងកំណើនសេដ្ឋកិច្ចរបស់កម្ពុជាសម្រាប់ការអភិវឌ្ឍប្រកបដោយនិរន្តរភាព យើងបានអនុវត្តការពង្រឹងសមត្ថភាពរបស់យើងលើការធ្វើពិពិធកម្មអាជីវកម្ម លើសពីការវិនិយោគហិរញ្ញវត្ថុបែបប្រពៃណី និងពេលបច្ចុប្បន្ន។ ស្មារតីនេះបានបំផុសឱ្យយើងបង្កើតឱកាសគួរឱ្យទាក់ទាញបន្ថែមទៀត ក៏ដូចជាបង្កើនការជឿទុកចិត្ត តាមរយៈការបណ្តុះបណ្តាលបុគ្គលពាក់ព័ន្ធទាំងអស់ រួមទាំងអតិថិជន និងយុវជនជំនាន់ក្រោយ ដោយប្រកាន់ខ្ជាប់នូវសុចរិតភាព ការលើកកម្ពស់ការអប់រំ និងការពេញចិត្តរបស់អតិថិជនជានិច្ច។
ជាថ្មីម្ដងទៀត ដោយឈរលើទិសដៅនៃបេសកកម្ម និងចក្ខុវិស័យសាជីវកម្ម យើងប្រើប្រាស់យ៉ាងពេញលេញនូវមូលដ្ឋានហិរញ្ញវត្ថុដ៏រឹងមាំ កិត្តិនាមក្រុមហ៊ុនល្បីល្បាញ និងធនធានមនុស្សចម្រុះ ដើម្បីក្លាយជាក្រុមហ៊ុន ឈានមុខគេបង្អស់នៅក្នុងប្រទេសកម្ពុជា។ ជាចុងក្រោយ យើងនៅតែប្តេជ្ញាចិត្តលើកកម្ពស់គុណភាពលើគ្រប់ទិដ្ឋភាពទាំងអស់នៅក្នុងក្រុមហ៊ុនរបស់យើង ហើយនឹងបន្តអភិវឌ្ឍការបង្កើតគុណតម្លៃ ដែលនឹងធ្វើឱ្យកេរ្តិ៍ឈ្មោះរបស់យើងកាន់តែខ្ទរខ្ទារទាំងក្នុងស្រុក និងទូទាំងពិភពលោក។
លោកស្រី Nicole Ho នាយកប្រតិបត្ដិនៃក្រុមហ៊ុនមូលបត្រ ភីភី លីង
ប្រវត្ដិរបស់ថ្នាក់ដឹកនាំ និងដៃគូសហការ
សមាសភាពថ្នាក់ដឹកនាំ និងដៃគូសហការរបស់ក្រុមហ៊ុនមូលបត្រ ភីភី លីង គឺជាបុគ្គលដែលត្រូវបានទទួលស្គាល់គុណវុឌ្ឍិពីនិយ័តករទីផ្សារនៃវិស័យហិរញ្ញវត្ថុទាំងក្នុងតំបន់និងអន្តរជាតិ ហើយមានជំនាញចម្រុះប្រកបដោយវិជ្ជាជីវៈ មានការប្តេជ្ញាចិត្តខ្ពស់ និងមានបទពិសោធន៍ច្រើនឆ្នាំនៅក្នុងវិស័យអប់រំ ហិរញ្ញវត្ថុ សេដ្ឋកិច្ច ច្បាប់ ការគ្រប់គ្រង អចលនទ្រព្យ និងវិស័យទាក់ទងជាច្រើនទៀត។ ចំណុចទាំងអស់នេះបានធ្វើឱ្យក្រុមហ៊ុនមូលបត្រ ភីភី លីង ក្លាយជាស្ថាប័នមួយ ដែលផ្ដល់ការប្រឹក្សាយ៉ាងល្អប្រកបដោយភាពជោគជ័យ និងនិរន្តរភាពលើសុខុមាលភាពហិរញ្ញវត្ថុរបស់ប្រជាជនកម្ពុជា ក៏ដូចជាជនបរទេសដែលកំពុងរស់នៅកម្ពុជា។
