ក្រុមហ៊ុនមូលបត្រ ភីភី លីង រៀបចំសិក្ខាសាលា ដើម្បីចែករំលែកទស្សនវិស័យ និងឱកាសវិនិយោគសម្រាប់ឆ្នាំ២០២៣
ក្រុមហ៊ុនមូលបត្រ ភីភី លីង មានមោទកភាពលើការបង្កើតវេទិកាសាធារណៈក្នុងគោលបំណងផ្ដល់ការអប់រំដល់សាធារណជនអំពីសារៈសំខាន់នៃចំណេះដឹងផ្នែកហិរញ្ញវត្ថុ បង្ហាញឱកាសវិនិយោគមាសដល់អតិថិជនគោលដៅ និងចូលរួមចំណែកដល់ការបង្កើតការងារ ក៏ដូចជាកំណើនសេដ្ឋកិច្ចរបស់ប្រទេសកម្ពុជាទាំងមូល។
នៅថ្ងៃទី១០ ខែធ្នូ ឆ្នាំ២០២២ ក្រុមហ៊ុនមូលបត្រ ភីភី លីង បានរៀបចំសិក្ខាសាលាស្ដីពីការវិនិយោគ ដោយបានទទួលស្វាគមន៍អ្នកចូលរួមជាង ១៥០នាក់ រួមទាំងអ្នកចូលរួមដោយផ្ទាល់ និងអ្នកចូលរួមតាមប្រព័ន្ធអនឡាញ ដែលមកពីហុងកុង ហ្វីលីពីន ឥណ្ឌូនេស៊ី និងចិន។
ត្រឹមតែរយៈពេលបីខែចុងក្រោយនៃ ឆ្នាំ២០២២ នេះ ក្រុមហ៊ុនមូលបត្រ ភីភី លីង បានបង្កើត និងរួមចំណែកដល់ភាពជោគជ័យនៃកម្មវិធីលើសពី ១០ ជាមួយនឹងលទ្ធផលវិជ្ជមាន និងការបង្កើតបាននូវមុខមាត់កាន់តែល្អប្រសើរឡើងសម្រាប់ទីផ្សារហិរញ្ញវត្ថុនៅកម្ពុជា។ ព្រឹត្តិការណ៍ទាំងនោះរួមមាន៖ សិក្ខាសាលាអប់រំចំនួនបីដងនៅសាកលវិទ្យាល័យបីផ្សេងៗគ្នា សិក្ខាសាលានៅគ្រប់បណ្ដាខេត្ដ-ក្រុងរដូវកាលទី២ (ខេត្តកំពង់ធំ និងខេត្តសៀមរាប) សិក្ខាសាលាពាក់ព័ន្ធនឹងឱកាសនិងការអភិវឌ្ឍវិថីការងារ ការចូលរួមពិព័រណ៍របស់ផ្សារមូលបត្រកម្ពុជា (ផ.ម.ក) និងវគ្គបណ្តុះបណ្តាលផ្នែកវិនិយោគមួយចំនួនទៀតផងដែរ។
សម្រាប់សិក្ខាសាលាវិនិយោគក្រោមប្រធានបទ «WRAP UP 2022, GET OPPORTUNITIES IN 2023» ដែលត្រូវបានរៀបចំឡើងនៅអគារ ហ្គោលដិន ថាវវើរ រាជធានីភ្នំពេញ នេះ វាបានបង្ហាញពីគោលបំណងសំខាន់របស់ ក្រុមហ៊ុនមូលបត្រ ភីភី លីង បន្ថែមទៀត ក្នុងការលើកកម្ពស់ចំណេះដឹង និងឱកាសវិនិយោគ។ វាគ្មិនកិត្តិយសចំនួនបួនរូប បានឡើងចែករំលែកយ៉ាងក្បោះក្បាយអំពីប្រធានបទ ពីព្រោះវាគ្មិនទាំងអស់សុទ្ធតែមានបទពិសោធន៍ច្រើនជាងមួយទសវត្សរ៍នៅក្នុងទីផ្សារឧបករណ៍និស្សន្ទ ឬ វិស័យអចលនទ្រព្យ។
ជាលទ្ធផល អ្នកចូលរួមទាំងអស់មានការចាប់អារម្មណ៍យ៉ាងខ្លាំងលើសិក្ខាសាលានេះ ព្រមទាំងទទួលបាននូវបទពិសោធន៍ និងចំណេះដឹងថ្មីៗ ដែលអាចនាំឱ្យពួកគាត់មើលឃើញ និងអាចរៀបចំផែនការអភិវឌ្ឍផ្ទាល់ខ្លួនសម្រាប់ ឆ្នាំ២០២៣។ កាន់តែពិសេស ការវិនិយោគក្នុងទីផ្សារឧបករណ៍និស្សន្ទ និងទីផ្សារអចលនទ្រព្យ គឺជាគោលដៅដ៏មានសក្តានុពលមួយសម្រាប់ពួកគាត់ ក្នុងការបង្កើនផលប័ត្រវិនិយោគ ខណៈដែលប្រទេសកម្ពុជា និងពិភពលោកទាំងមូលបាន និងកំពុងធូរស្រាលបន្តិចម្តងៗពីផលលំបាក ដែលបង្កឡើងដោយជំងឺរាតត្បាតសកល។
សកម្មភាពបន្ទាប់របស់ ក្រុមហ៊ុនមូលបត្រ ភីភី លីង គឺចាប់យកឱកាសដ៏អស្ចារ្យនេះ ជាមួយអតិថិជន និងអ្នកដែលចង់ចូលរួមជាមួយក្រុមហ៊ុនទាំងអស់។ ក្រុមហ៊ុនមូលបត្រ ភីភី លីង ក៏កំពុងបង្កើតក្រុមការងារឱ្យកាន់តែធំជាងមុន ដើម្បីផ្ដល់ជូនអត្ថប្រយោជន៍កាន់តែប្រសើរដល់អតិថិជនគោលដៅ និងដើម្បីសម្រេចបាននូវភាពជោគជ័យកាន់តែធំសម្រាប់ដំណើររួមគ្នាដ៏យូរអង្វែង។
